Aye Sanam Teray Baghair اے صنم تیرے بغیر

نظم

اے صنم تیرے بغیر

اے گلِ تر جب خزاں بدبخت نے

تیرے دلکش رنگ ہائے حسن سے

اک جلن محسوس کی اور سازشِ شب خون کی

جب ترے ہونٹوں کا رس

یک بہ یک گھٹنے لگا اور پپڑیاں جمنے لگیں

جب ترے گالوں پہ سُرخی کی جگہ

پیلے پیلے سائے لہرانے لگے

جب تری مسحور کن مخمور آنکھوں کے تلے

سیاہی مائل دو بڑے حلقے نظر آنے لگے

جب ترے ابرو کی جنبش کم ہوئی

جب تری پلکوں کی از خود تھرتھراہٹ بڑھ گئی

جب ترے ہاتھوں سے میرے ہاتھ میں

منتقل ہونے لگی اک سرد رَو

جب تری آنکھوں سے کچھ مایوسیاں

بہہ رہی تھیں آنسوئوں کے روپ میں

اور مجھ سے کہہ رہی تھیں اَن کہی

چھوڑدینا کوئی مشکل نہیں ۔۔۔۔۔۔ اے زندگی

چھوڑنا تجھ کو مری مشکل ہوئی

غم اگر کچھ ہے تو بس اتنا غم ہے

تو بہت تنہا نہ رہ جائے کہیں

اے مرے ساتھی نگہبانی مری

تجھ کو یاد آکر نہ تڑپائے کہیں

تیری دنیا پر کسی بھی سمت سے

دھوپ کا سایہ نہ پڑجائے کہیں

میں یہ سب منظر کھڑا سہتا رہا

سرد لہریں سمتِ دل بڑھتی رہیں

دل مرا آتش کدہ بنتا رہا

خوف و امید و یقیں کے درمیاں

برلب خاموش با صد احترام

مالکِ کُل سے فقط یہ کہہ سکا

میرا ایماں ہے کہ تُو جبّار ہے قہّار ہے

پر مجھے یہ فخر بھی تو ہے کہ توُ رحمان ہے ستّار ہے

اور پھر مجھ سے نہ کچھ مانگا گیا

لب کھلے میرے نہ مجھ سے ہاتھ پھیلایا گیا

وہ جو حاضر ہے وہ ناظر بھی تو ہے

واقفِ احوال ہے ما فی الصدور

کیا میں کہتا اس سے پھر بین السطور

اس کو سب معلوم ہے ۔۔۔۔ اے جانِ جاں

تُو شجر ہے برگ میں سہما ہوا

روٹھ جائے تجھ سے گر بادِ بہار

پیلے پیلے خشک پتّوں کی طرح

ٹوٹ کر گرجائوں گا میں شاخ سے

تُو صنم میرا ہے میں مٹّی تری

تُو سلامت ہے تَو ہے قیمت مری

ورنہ میں کیا اور مری ہستی ہی کیا

خاک ہوں سو خاک میں مل جائوں گا

اے صنم تیرے بغیر ۔۔۔۔۔ اے صنم تیرے بغیر