Teray Khayal Ki Dunya ترے خیال کی دنیا

غزل

پہلی غزل [C-1962]

ترے خیال کی دنیا سجا رہا ہوں میں

بس ایک کلی سے گلستاں بنا رہا ہوں میں

تمہاری زلف کی لہروں میں رقص ہے میرا

تمہارے دوش پہ دستِ صبا رہا ہوں میں

تمہیں نے اپنی لکیروں کو میرا نام دیا

تمہارے ہونٹوں پہ حرف دعا رہا ہوں میں

نہیں ہے عکسِ وفا مجھ میں کوئی بات نہیں

برائے شہرِ وفا آئینہ رہا ہوں میں

سخنوری مرا دعویٰ نہ آزری مقصود

غزل کو آپکا پیکر دکھا رہا ہوں میں

نہیں ہے ان سے مسیحائی کی امید تو پھر

یہ زخمِ دل بھی اُنہیں کیوں دکھا رہا ہوں میں

سویرا پاتے ہی اُس نے بھُلا دیا مجھ کو

وہ جس کی رات کا تنہا دیا رہا ہوں میں