خواہشِ گریہ کو پلکوں تک نہ آنا چاہیے

خواہشِ گریہ کو پلکوں تک نہ آنا چاہیے آبروئے غم بکھرنے سے بچانا چاہیے

تاکہ پسپائی پہ ہومجبور شرمندہ رہے درد جب حد سے بڑھے تو مُسکرانا چاہیے

فُرصتِ فکررفوئے چاک دل کس کو مگر سب کو بہرِ داستاں کوئی فسانہ چاہیے

قافیہ بندی کا فن ہی تو نہیں ہے شاعری شعر کو فکرونظر بھی شاعرانہ چاہیے

عشق کا لمحہ بھی آتا ہے محبّت میں ضرور ہاں مگر اس ایک لمحہِ کو زمانہَ چاہیے

بے سبب تو کوئی ہستی بھی عدم ہوتی نہیں انتہائے زیست کو بھی اک بہانہ چاہیے

گوکہ اب تادیر مشکل لگ رہا ہے ان کا ساتھ پھر بھی اے اشعؔر جہاں تک ہو نبھانا چاہیے