حد نگاہ میں کوئی شجر تو آنے دو

حد نگاہ میں کوئی شجر تو آنے دو کوئی پڑاؤ کی صورت نظرتو آنے دو

ہمیں بھی آتا ہے قسمت کو ڈھونڈنا لیکن ہمارے شہر میں اک دن سحر تو آنے دو

ذرا تو صبر کرو اے مری تمنّاؤ دعا کروں گا مقامِ اثر تو آنے دو

سرِ نیاز تو ازخود ہی جھک پڑے گا مگر جو سربلند کرے گا وہ در تو آنے دو

قبولیت کی گھڑی ڈھونڈتی پھرے گی مجھے مری دعاؤں میں سحرِ اثر تو آنے دو

کہیں تو آہی ملے گا وہ ایک دن مجھ سے پر اس کو یاد مری رہ گزر تو آنے دو

کریں گے خواہشِ جلوہ بھی ایک دن لیکن ہماری آنکھ میں وصفِ بصر تو آنے دو

کریں گے قتل بھی مظلوم بھی ہمیں ہونگے ہمارے ہاتھوں میں ان کا ہنر تو آنے دو

کماں میں تیر ابھی کیا سجائیں ہم اشعؔر جو آبروئے ہدف ہے نظر تو آنے دو