بس آئینہ نہیں ہے

بس آئینہ نہیں ہے

تجھے تو یاد ہوگا ہم نے جو قربانیاں دیں

تجھے اپنا لہو تک دیدیا تھا

تجھے اپنا بنایا تھا بڑی چاہت سے ہم نے

جلا کر آشیاں اپنا تجھے پایا تھا ہم نے

اور اس کے بعد بھی ہم پر جو گزری

تجھے اُسکا بھی سب ادراک ہوگا

ہمارا تجھ سے جو رشتہ ہے اب تک

اگرچہ ہے بڑا مضبوط بندھن

مگر کچھ لوگ ایسے بھی ہیں جاناں

رہا ہے آج تک آنکھوں میں جن کی

مثالِ خار یہ رشتہ ہمارا

لہٰذا آج تک قائم ہیں ضد پر

یہ نامنظور نا منظور ہی کہتے رہے ہیں

ہمیں کیا قتل کرتے ہیں تجھے بھی توڑتے ہیں

نشہ طاقت کا چڑھ جائے تو اکثر

یہ تیرا بے وفا کہتے ہیں ہم کو

ہمیں جاناں ہنسی آتی ہے اُن پر

کہ جن کے پاس سب کچھ ہے، بس آئینہ نہیں ہے!۔۔