دل فریبی کے لیے منظر بھی دلکش چاہیے

دل فریبی کے لیے منظر بھی دلکش چاہیے توڑنے کو دل مرا پتھر بھی دلکش چاہیے

ہاں یہ ممکن ہے کہ میں پی کر بہک جاؤں مگر صرف مئے کافی نہیں ساغر بھی دلکش چاہیے

ہر جگہ مجھ سے جبیں سائی کی امّیدیں نہ رکھ آستاں کہدوں جسے وہ در بھی دلکش چاہیے

چین سے سونے نہیں دیتی شکن آلودگی صرف کمرہ ہی نہیں بستر بھی دلکش چاہیے

ہم نے مانا آپ کے اندر چراغاں ہے مگر اک دیا اثبات کو باہر بھی دلکش چاہیے

مل تو سکتا ہے لقب شاہین کا لیکن حضور التزام  ِجُراَت و شہپر بھی دلکش چاہیے

ہے غُبارِ کارواں پیچھے اندھیرا سامنے اور امیرِ کارواں اس پر بھی دلکش چاہیے

زخمِ تازہ سرخرو لگتے ہیں اوپر سے سبھی زخمِ دل کو اک کسک اندر بھی دلکش چاہیے

اوک سے پینے میں بھی اک لطف ہے لیکن مجھے صاف سا پانی بھی اور گاگر بھی دلکش چاہیے

یوں غزل کہنے کو اک صحرا میں اشعؔر کی طرح دردِ دل کے ساتھ اک دلبر بھی دلکش چاہیے