خرد کی پاسبانی میں دوانے دیکھتا ہوں

خرد کی پاسبانی میں دوانے دیکھتا ہوں حقیقت جانتا ہوں اور فسانے دیکھتا ہوں

حیات آگیں رہا ہے جن کی تعبیروں کا منظر ابھی تک میں وہی سپنے سہانے دیکھتا ہوں

کوئی تعدادِ حمدِ رب مقرّر کیسے کردوں ہر اک تسبیح میں گنتی کے دانے دیکھتا ہوں

تری نظر اغیار پر اُٹھتی ہے جب بھی میں اپنے دل پہ تیروں کے نشانے دیکھتا ہوں

کسی راوی پہ اپنا فیصلہ دینے سے پہلے میں اُس کی داستاں کے تانے بانے دیکھتا ہوں

پلٹ کر دیکھنے سے ڈر ہے پتّھر ہو نہ جاؤں میں رکھ کر سامنے گزرے زمانے دیکھتا ہوں

یقیں سا ہے کہ تعبیریں بھی دیں گے خواب میرے سویرا ہوتے ہی اُٹھ کر سرہانے دیکھتا ہوں

میں جب بھی اعتبارِ زندگی کرتا ہوں دم بھر اجل کے ان گنت رنگیں بہانے دیکھتا ہوں

بھلا کیا کام آیا وقت کا مرہم بھی اشعؔر گُلِ تازہ کی طرح دُکھ پرانے دیکھتا ہوں