مُسلسل رت جگا دونوں کی عادت ہوگئی ہے

مُسلسل رت جگا دونوں کی عادت ہوگئی ہے ہمیں بھِی چاند سے شاید محبّت ہوگئی ہے

نہ اُوڑھوں چاندنی تو نیند کا امکان کیسا شب ِ مہتاب تو جیسے ضرورت ہوگئی ہے

گلہ شکوہ مناسب تھا اگر اپنوں سے ہوتا ہمیں اک اجنبی سے کیوں شکایت ہوگئی ہے

کسی مُفلس کو اب انصاف کیسے مل سکے گا کہ اب زردار کی باندی عدالت ہوگئی ہے

بدن میں اس پری وش کے رواں تھا خونِ قائد سو اس کو بھی قیادت کی شکایت ہوگئی ہے

ہمارے شہر کا احوال تم بس یوں سمجھ لو ہنسی بچّوں کے چہروں سے بھی رُخصت ہوگئی ہے

سرِ محشر فرشتوں کو یہ حیرت ہوگی اشعؔر ندامت ہی تری بس وجہِ رحمت ہوگئی ہے