قلم جو بازار میں نہیں ہے

قلم جو بازار میں نہیں ہے

وہ خامہء انمول تھا جو پہلے

محبّتوں کو جو لکھ رہا تھا

صریر جس کی تھی جل ترنگ سی

وہ جس کی دھن پر مرے وطن میں

محبّتیں رقص کررہی تھیں

قلم جو تنقید کررہا تھا

قلم وہ تعمیر کررہا تھا

قلم جو تحریر کررہا تھا

وہ صرف تخلیق کررہا تھا

مگر نہ جانے یہ کیا ہوا ہے

ہوا اک ایسی چلی وطن میں

ستونِ خامہ گراگئی جو

ستوں یہ چوتھا گرا ہے جب سے

قلم کا بازار گرگیا ہے

بدیسیوں نے قلم ہمارے

خرید رکھے ہیں کوڑیوں میں

قلم جو تھا ایک سیفِ صیقل

جو کاٹ دیتی تھی سب اندھیرے

وہی تو ہے آج کند خنجر

نہ رحم سے ہے جسے علاقہ

نہ نور سے ہے جسے محبّت

نہ حرفِ اُلفت سے جس کو نسبت

جو بے ضمیروں کے ہاتھ میں ہے

قلم وہ ایسی ہےبادِ صرصر

بجھا دیے ہیں چراغ جس نے

اندھیرا پھیلا دیا ہے جس نے

کہ جس نے پامال کردیا ہے

تمام گلشن محبّتوں کا

مگر زمانہ یہ جان رکھے

کئی چراغِ وفا ہیں ایسے

جو آندھیوں میں بھی جل رہے ہیں

جو ہر اندھیرے سے لڑرہے ہیں

یہی وہ کارِ جنوں ہے شاید

خِرَد کی جس سے ٹھنی ہوئی ہے

اسی جنوں سے ہی بات اپنی

ابھی تلک کچھ بنی ہوئی ہے

انہی چراغوں کے دم سے شاید

ابھی امّیدوں کی روشنی ہے

بجھا بھی دیں گر انہیں ہوائیں

تو ان کے پیچھے ملیں گے ایسے

نقوشِ پا کہکشاں کی صورت

جو منزلوں کا سراغ دیں گے

یہی وہ کچھ دستِ حق ہیں باقی

کہ جن کے ہاتھوں میں وہ قلم ہے

قلم جو بازار میں نہیں ہے