حِرصِ دنیا اگر نہیں ہوتی

حِرصِ دنیا اگر نہیں ہوتی زندگی در بہ در نہیں ہوتی

زندگی گر سفر نہیں ہوتی چین سے بھی بسر نہیں ہوتی

ہم پرستار ہیں ہنر کے مگر صرف شہرت ہنر نہیں ہوتی

آج تو جاگ اُٹھو خدا کے لیے روز دیکھو سحر نہیں ہوتی

دُکھ کے مانوس موسموں کی بیل کس کی دیوار پر نہیں ہوتی

دھوپ اوڑھے بغیر دنیا میں کوئی شے بھی شجر نہیں ہوتی

آسماں کیوں یہ سوچتا ہے مجھے خواہشِ بال و پر نہیں ہوتی

دسترس میں کوئی بھی شے اپنی باعثِ کرّوفر نہیں ہوتی

آتشِ عشق کم تو ہوتی ہے ہائے ٹھنڈی مگر نہیں ہوتی

گر یقین عطا نہ ہو اشعؔر التجا پُر اثر نہیں ہوتی