ہر اک ذی ہوش پر اب تو عیاں ہے رات کا موسم

ہر اک ذی ہوش پر اب تو عیاں ہے رات کا موسم اب اپنے شہر سے جاتا کہاں ہے رات کا موسم

امیرِ شہر گر پوچھے کہاں ہے رات کا موسم تو کہنا بے ضمیروں سے نہاں ہے رات کا موسم

نہ سورج کی حرارت ہے نہ بادل اور نہ بارش ہے چمن کیسے پھلے پھولے خزاں ہے رات کا موسم

زبانیں کاٹ دی جاتی ہیں جن کی غور سے دیکھو انہی کی بے زبانی میں بیاں ہے رات کا موسم

سبھی مہمانِ مقتل منتظر ہیں اپنی باری کے اور اک سفّاک قاتل میزباں ہے رات کا موسم

گلا سچّائی کا اندازِ مثبت گھونٹ کیسے دے سویرا کیسے لکھ ڈالوں رواں ہے رات کا موسم

بری الذمّہ تو میں بھی نہیں میں نے بھی روکا تھا میں سمجھا، دو گھڑی کا مہماں ہے رات کا موسم

ہر اک موسم مزاجِ وقت کا مرہون ہے اشعؔر جہاں کل صبحِ روشن تھی وہاں ہے رات کا موسم