یہ اجنبی سی انوکھی سزا نہ دو مجھ کو

یہ اجنبی سی انوکھی سزا نہ دو مجھ کو

اُٹھا کے تم کفِ خنجر دعا نہ دو مجھ کو

نہ تھی جو میرے لیے وہ وفا نہ دو مجھ کو پلا دو زہر ، پہ جھوٹی دوا نہ دو مجھ کو

ہے مجھ کو شوقِ تلاطم بھی عزمِ ساحل بھی تمہارا کیا ہے ارادہ بتا نہ دو مجھ کو

یہ کیا کہا کہ تمہیں جاں بھی دے نہیں سکتا اب اپنی آنکھ سے اتنا گرا نہ دو مجھ کو

بجھا ہوا سا دیا تم کو لگ رہا ہوں اگر ذرا سا چھو کے مجھے تم جلا نہ دو مجھ کو

نہ مجھ میں ظرفِ سمندر، نہ شورِ دریا ہے کسی مرض کی بھی یارو دوا نہ دو مجھ کو

پلٹ کے آئی ہے آواز خود مری یا تم یہ کہہ رہے ہو کہ اشعؔر صدا نہ دو مجھ کو