نہ کوئی دریا نہ دریا کے خواب دیکھےہیں

نہ کوئی دریا نہ دریا کے خواب دیکھےہیں جدھر نِگاہ اُٹھائی سراب دیکھے ہیں

تمہیں نہ دیکھا تھا جب تک تو سہل تھا جینا تمہاری راہ میں غم بے حساب دیکھے ہیں

بنا رہا تھا میں بیٹھا طویل منصوبے کہ میں نے مٹتے ہوئے کچھ حباب دیکھے ہیں

وہ جس نے ہم پہ محبّت کی بارشیں کی ہیں اُسی نگاہ میں لاکھوں حجاب دیکھے ہیں

قرارِ امن، محبّت، وفا، نویدِ سحر یہ کیا ہوا ہے مجھے، کیسے خواب دیکھے ہیں

تمہاری قوّتِ زر ہم سے ہار جائے گی تمہارے جیسے ہزاروں جناب دیکھےہیں

کسے بتاتے ہو اشعؔر یہ فرقِ ملّت و قوم جہاں نے قوموں کے لائے عذاب دیکھے ہیں