درد جب آنکھ سے اشکوں کی روانی مانگے

درد جب آنکھ سے اشکوں کی روانی مانگے مجھ سے دل ضبط کا اندازِ جوانی مانگے

بات ایک روز نئی چاہیے سچ ہو کہ نہ ہو عالمِ طفل تو بس کوئی کہانی مانگے

کیا بھلا خاک کرے گا وہ کوئی راہبری ہر مسافر سے جو منزل کی نشانی مانگے

عشق کیا عام ہوا اپنا کہ دنیا ہم سے ایک اک لمحہِ کی اک رام کہانی مانگے

گھر تو پیارا ہے ہمیں اب بھی رگِ جاں کی طرح گھر کا ماحول مگر نقل مکانی مانگے

اپنا ہر عکس نئے رنگ میں دیتا ہے ہمیں اور ہم سے وہی تصویر پرانی مانگے

درد اظہار کاطالب تو ہے اشعؔر لیکن رُونمائی کے لیے طرزِ نہانی مانگے