یادیں تمہاری آج بھی یوں دشتِ جاں میں ہیں

یادیں تمہاری آج بھی یوں دشتِ جاں میں ہیں آباد جیسے بستیاں خالی مکاں میں ہیں

رکھیں مزاجِ عشق کو ہم کس کے سامنے مدہوش عام لوگ بھی سودوزیاں میں ہیں

دستِ جہاں سے لینے مصائب نہ جائیے درماں تمام درد کے اپنے جہاں میں ہیں

کیا منصفی ہے بے کس و مفلس ہے دار پر اور قاتلوں کے نام پسِ زراماں میں ہیں

ہے آزمائشوں کا تسلسل کچھ اس طرح جیسے ازل سے تا بہ ابد امتحاں میں ہیں

بس فرقت و وصال نہیں اس کی داستاں دنیا کےاور غم بھی دل بے کراں میں ہیں

دیکھی ہوئی ہیں آتشِ عارض کی سرخیاں شعلے بھی دیکھ لیں گے جوبرقِ تپاں میں ہیں

جب سے لُٹی بہارِ چمن دیکھتے ہیں ہم اشعؔر ترے سُخن بھی حصارِ خزاں میں ہیں