دل کا ہر داغ لہو دے کے جلا لیتا ہوں

دل کا ہر داغ لہو دے کے جلا لیتا ہوں میں شبِ غم کو ستاروں سے سجا لیتا ہوں

کوئی پل جب کسی پہلو مجھے دیتا ہے قرار درد کی لو میں اسی سمت بڑھالیتا ہوں

آتشِ عشق تو اشکوں سے بھڑکتی ہے مگر اک ذرا آتشِ جذبات بجھالیتا ہوں

شب ڈھلے صبح کے تارے نے یہ پوچھا اکثر کیا تری آنکھ سے میں نیند چُرا لیتا ہوں

سرگراں تم نہ پھرو ایذارسانی کو مری میں تو خود گردشِ ایّام کو جالیتا ہوں

ناخدا تجھ پہ ہی اک تکیہ نہیں ہے میں تو موجِ برہم سے بھی ساحل کا پتا لیتاہوں

کون دیتا ہے تجھے طرزِ مسیحائی نئے میں ہی ہر درد ترا جاں سے لگا لیتا ہوں

ایک مانوس مہک جب بھی صبالاتی ہے ان کو انفاس کی آغوش میں پالیتا ہوں

ڈال کر چہرے پہ اشعؔر میں تبسّم کی نقاب کربِ تنہائی کو دنیا سے چھُپا لیتا ہوں