درد تقسیم کے امکاں سے بچا رکھا ہے

درد تقسیم کے امکاں سے بچا رکھا ہے اپنا سرمایۂ کُل دل میں چھُپا رکھا ہے

وہ پلٹ آیا تو سینہِ سے لگالیں گے اُسے جانِ من چھوڑیے ان باتوں میں کیا رکھا ہے

آؤ آرائشِ جاں کچھ تو بدل دیں مل کر کتنی مُدّت سے غمِ ہِجَر بسا رکھا ہے

بھولنا چاہوں تو کچھ اور اُلجھ جاتا ہوں اُس نے یادوں کا عجب جال بچھا رکھا ہے

تاکہ دنیا تری آمد کا نہ پاجائے سُراغ نام آہٹ کا تری بادِ صبا رکھا ہے

دل کو میرے دلِ ویراں تو نہ کہیے صاحب میں نے تو درد کا اک شہر بسا رکھا ہے

شامل زادِ سفررکھتے تھے تو آساں تھا سفر رات کا ساتھ ہے اور گھر میں دیا رکھا ہے

کیا بجُھا پائے گی تو میری محبّت کا چِراغ اے ہوا دیکھ تری زد پہ جلا رکھا ہے

بے وفا کیسے کہوں میں کہ سرِ بزم ابھی کل ہی تو نام ترا رشکِ وفا رکھا ہے

کوئی منصف نظر آئے تو میں پوچھوں اشعؔر کیوں مرے شہر کو مقتل سا بنا رکھا ہے