دل کو جب خون رلا دو تو غزل ہوتی ہے

دل کو جب خون رلا دو تو غزل ہوتی ہے دار پر خود کو سجادو تو غزل ہوتی ہے

دل کے لُٹ جانے کی روداد سرِ بزم انہیں آنکھوں آنکھوں میں سُنادو تو غزل ہوتی ہے

ہو ترنّم وہ تمہارا کہ تبسّم بہ سکوت ایک دیپک بھی جلا دو تو غزل ہوتی ہے

اپنی پُر شوق نگاہوں کی حرارت سے اگر تم کوئی غُنچہ کھلادو تو غزل ہوتی ہے

جنبش ابرو کا ادنیٰ سا اشارہ پاکر خود کو زہر اب پلا دو تو غزل ہوتی ہے

داغِ دل زخمِ جگر پاؤں کے چھالے آنسو سب مسیحا سے چھُپا دو تو غزل ہوتی ہے

ضبطِ دل پر جو نہ رہ جائے تصرّف باقی ہستی ء دل ہی مٹا دو تو غزل ہوتی ہے

مسکراتی ہوئی ان شوخ نگاہوں کو کبھی کوئی پیاری سی سزا دو تو غزل ہوتی ہے

دل میں جب اس کے کوئی جیت کا امکاں نہ رہے دفعتاً خود کو ہرا دو تو غزل ہوتی ہے

جو تمہیں دے کے چلا ہِجَرِ مُسلسل کی سزا اس کو جینے کی دعا دو تو غزل ہوتی ہے

زُلف سے اٹھتی ہوئی خوشبو کی لو پر اشعؔر گرم سانسوں کو جمادو تو غزل ہوتی ہے