قفس سے اب کسی صورت نکل کر دیکھتے ہیں

قفس سے اب کسی صورت نکل کر دیکھتے ہیں سُوادِ حُرّیت پھر گھر بدل کر دیکھتے ہیں

ہمارے خواب کی تعبیر جن لوگوں نے دیکھی وہ سب خوابوں سےڈرتے ہیں سنبھل کر دیکھتے ہیں

بہت ممکن ہے مل جائے ہمیں بھی اپنی منزل کسی لمبے سفر میں پاؤں شل کر دیکھتے ہیں

یقیں اس کے ہر اک وعدہِ کا کرلیتے ہیں لیکن نتیجہ اس یقیں کا ہاتھ مل کر دیکھتے ہیں

یہی موسم ہے گر ان کو منالینے کا موسم تو سر یہ مرحلہ بھی یار کل کردیکھتے ہیں

کہاں تک اور کتنا ضبط کا یارا ہے اس میں مُجسّم آرزو بن کر مچل کر دیکھتےہیں

ہمیں وہ سنگِ بے حس ہی سمجھتا ہے تو اشعؔر چلو یونہی سہی پتّھر میں ڈھل کر دیکھتے ہیں