عجب تھا حرفِ طلب احتساب سے پہلے

عجب تھا حرفِ طلب احتساب سے پہلے کئی سوال اُٹھے اک جواب سے پہلے

خیال سود و زیاں خوب ہے مگر ناصح بہت ہے کارِ جنوں اس حساب سے پہلے

کوئی نہ باندھنا تمہید جب بھی سچ لکھو ہے پیش لفظ مُلمّع کتاب سے پہلے

گزر کے آگیا دریا سے اور پیاسا ہوں کہاں تھا میرا تعارف سراب سے پہلے

نہیں ہے اس کی عطا پر یقیں تو حرفِ دُعا ہے بارشوں کی تمنّا سحاب سے پہلے

گلوں کی سمت بہت دیکھ بھال کر بڑھنا کہ خار ہوتے ہیں اکثر گلاب سے پہلے

بساطِ زندگی کیا ہے نہ پوچھتے اشعؔر مگر ملے ہی کہاں تم حباب سے پہلے