شمعِ انمول کو ارزاں نہیں ہونے دیتا

شمعِ انمول کو ارزاں نہیں ہونے دیتا وہ اسے شعلہ بہ داماں نہیں ہونے دیتا

لاکھ ہو ذہن پراگندہ و برہم لیکن وہ کبھی زلف پریشاں نہیں ہونے دیتا

عین ممکن ہے کہ پھر کوئی بلندی پا جائے آدمی خود کو ہی انساں نہیں ہونے دیتا

میں تو جاتا ہوں تکلّف کی ردا سر پہ رکھے ہاں مگر وہ مجھے مہماں نہیں ہونے دیتا

درمیاں فاصلہ رکھتا ہے جو ساحل پہ سدا مجھکو تنہا پئے طوفاں نہیں ہونے دیتا

اشک نظروں میں جو آجائیں تو عزّت کھودیں میں نمائش سرِ مژگان نہیں ہونے دیتا

بس دیے جاتا ہے ہر وقت دعائیں اشعؔر وہ مری موت کو آساں نہیں ہونے دیتا