بات تھی پھول کی کہانی تک

بات تھی پھول کی کہانی تک بڑھ کے پہنچی تری جوانی تک

خواہشِ زندگی تو ہے لیکن جانِ جاں تیری ضوفشانی تک

جاہِ دنیا ہے تیرا ساتھ ہی کیا اور ہے بھی تو دارِ فانی تک

وہ مرےدوست جن پہ تکیہ تھا گرگئے وہ بھی آنا کانی تک

دے کے دل ہم نے کب یہ سوچا تھا گم وہ کردے گا یہ نشانی تک

شوقِ دریا تو ہے سبھی کو مگر کون جاتا ہے گہرے پانی تک

کوئی شکوہ ہے گر تو کہہ ڈالو بات پہنچے نہ بدگمانی تک

استعاروں کا کیا کروں اشعؔر وہ نہیں جائیں گے معانی تک